O 17 de decembro de 1999 a Asemblea Xeral das Nacións Unidas declarou o 25 de novembro como Día Internacional da Eliminación da Violencia contra as Mulleres, convidando a gobernos, organizacións internacionais e organizacións non gobernamentais a desenvolver actividades dirixidas a sensibilizar a poboación a respecto da situación de violencia na que viven moitas mulleres.

A violencia machista é a expresión máis extrema das desigualdades sociais que viven as mulleres. Un tipo de violencia que sofren as mulleres polo feito mesmo de selo, unha desigualdade silenciada, agochada e en moitos casos normalizada. Dende 2003 ata maio de 2017, o Instituto da Muller rexistrou 53 asasinatos machistas en Galicia, e 780 no Estado.

Estes datos fannos considerar que esta dramática realidade require dunha resposta unánime e firme de toda a sociedade, que poña de manifesto o rexeitamento social de todas as formas de violencia contra as mulleres.

Por isto, nunha experiencia inédita, máis de cincuenta concellos galegos unímonos nunha acción transmedia para incidir de xeito máis eficaz na sociedade, coa intención de cubrir de negro o mapa galego do 23 ao 26 de novembro.

Os estabelecementos comerciais, institucións e a cidadanía en xeral vestiremos de negro en sinal de dor por todas as mulleres que sofren violencia, e como resposta á máis dura das súas consecuencias, a morte… de María José, Virginia, Rosa, Sofía, Catalina, Ana Belén, Raquel…

Por elas! Por todas!

Queremos vivir libres de violencias machistas.

Para unha colleita común, utiliza nas redes sociais as etiquetas:
#Galiciaennegro
#ContraAsViolencias
#Cambreennegro
#Ennegrocontraasviolencias


 

Materiais da campaña: